Свята Піянерыі
Прыём у піянеры – знамянальная падзея ў жыцці кожнага школьніка. У мінулую суботу ў навучальных установах раёна прайшлі лінейкі, прысвечаныя дню ўтварэння Беларускай рэспубліканскай піянерскай арганізацыі.
Піянерскі збор вучняў СШ №2 г.п.Зэльва адбыўся каля брацкай магілы савецкіх воінаў і партызан.
З хваляваннем 35 хлопчыкаў і дзяўчынак далі абяцанне любіць сваю Радзіму, быць добрымі, сумленнымі і справядлівымі, заўсёды трымацца статута і традыцый БРПА.
Пасля клятвы школьнікам чырвона-зялёныя гальштукі павязалі старэйшыя сябры, настаўнікі і госці свята.
З наказам да юных піянераў звярнулася намеснік дырэктара па выхаваўчай рабоце Святлана Шэўчык. Яна пажадала падлеткам заўсёды быць прыкладам ва ўсім для тых, хто яшчэ збіраецца ўступіць у рады арганізацыі, добра вучыцца, карыснымі справамі і дасягненнямі праслаўляць родную школу.
Пасля ўрачыстага моманту прысутныя аддалі даніну памяці героям Вялікай Айчыннай вайны, усклалі кветкі да вечнага агню і памятнага знака воінам-інтэрнацыяналістам.
Мерапрыемства прадоўжылася ў школе. Старшакласнікі падрыхтавалі гульню-падарожжа, у час якой іх меншыя сябры ўдзельнічалі ў розных конкурсах, адгадвалі загадкі, атрымлівалі прыемныя салодкія падарункі. Адным словам, свята Піянерыі прайшло цікава і з карысцю.