Расклад на свята "Ганненскі кірмаш" ад А да Я
Асноўным месцам першага дня кірмашу стане пляж гарадскога пасёлка. Тут пройдуць разнастайныя спаборніцтвы і конкурсы. Аматараў песеннай творчасці чакае цікавая канцэртная праграма. Не прапусціце!
Барабаны. Ігрой на гэтых музычных інструментах будуць пакараць зэльвенскую публіку мінскія «Перцы». Рытм, пульс, драйв суботнім вечарам запануюць на галоўнай сцэне свята. Сталічныя хлопцы-віртуозы пакажуць сапраўдны майстар-клас. Будзьце ўпэўнены!
Віват, кірмаш! Інтрыгу вакол адкрыцця свята арганізатары фестывалю захоўваюць да апошняга моманту. Які сюжэт абяруць для галоўнай тэатралізаванай дзеі, невядома, але абяцаюць поўнае пагружэнне ў атмасферу мінулага. Згодна з добрай традыцыяй з віншавальнай прамовай са сцэны да ўдзельнікаў і гасцей звернуцца кіраўніцтва раёна і ганаровыя госці.
Гісторыя Ганненскага кірмашу, які некалі грымеў на ўсю Еўропу, вельмі займальная. З самымі цікавымі яе фактамі мясцовыя артысты і калектывы аматарскай творчасці Зэльвеншчыны пазнаёмяць гасцей у час тэатралізаванага адкрыцця.
Дэлікатэсамі можна будзе пачаставацца ў час свята. Нагуляўшы апетыт па гандлёвых радах і на атракцыёнах, абавязкова скарыстайцеся магчымасцю адведаць брэндавыя ласункі ўласнага прыгатавання ад гаспадароў аграсядзіб. Прысмакі на любы густ чакаюць сапраўдных гурманаў.
Жарабя ў цэнтральным скверы пасёлка стане сапраўдным упрыгажэннем вашага памятнага кірмашовага фота. У вас яшчэ няма такога здымка?! Абавязкова зрабіце сэлфі на ўдачу! А фотаздымак дабаўляйце ў інстаграм і адзначайце нашу газету (@gazeta_praca) – будзем рэпосціць.
Зальвянка. Рэчка, з якой у свой час усё і пачыналася. Можаце сабе ўявіць, што літаральна тры вякі таму наша Зальвянка была судаходнай? Прыток Нёмана дастаўляў у Зэльву на кірмаш купцоў з самых аддаленых вугалкоў Еўропы.
І ў агонь, і ў ваду! Відовішчнымі чакаюцца паказальныя выступленні парашутна-дэсантнай службы авіяцыі Міністэрства па надзвычайных сітуацыях. Ад такога яркага элемента сучаснасці не адзін чалавек атрымае асалоду, а выратавальнікі праявяць сябе зусім у іншай іпастасі.
Конь галоўным сімвалам кірмашу застаецца на працягу больш чым трох стагоддзяў. Сёлета ўдзельнікаў свята чакае не толькі шмат цікавых і займальных мерапрыемстваў з удзелам коней, але і разнастайных вырабаў, друкаванай прадукцыі з іх выявай.
Лаўкі. Без іх – як сучасных, так і ў стылі XVIII стагоддзя – не абыходзіцца ніводны кірмаш. Гандляваць будуць як прадпрыемствы, індывідуальныя прадпрымальнікі, рамеснікі, так і гандляры-аматары. Дарэчы, апошнія нават прадэманструюць свае здольнасці ў конкурсе, які так і называецца «На лепшага гандляра-аматара». А тым, хто прыедзе на свята першы раз, цікава будзе наведаць імправізаваныя лаўкі, дзе будуць прадстаўлены разнастайныя тавары, што карысталіся попытам у гістарычны перыяд росквіту кірмашу.
Музейны пакой «Ганненскі кірмаш» па-ранейшаму запросіць на знаёмства са шляхецкімі касцюмамі, картамі гандлёвых шляхоў, што вялі праз Зэльву, узорамі дастаўленых купцамі тавараў. Асобны раздзел экспазіцыі прысвечаны коням – галоўнаму тавару гандлю на кірмашы. Акунуцца можна і ў сучасную гісторыю свята праз прызму фотаздымкаў розных гадоў.
Нязменны конкурс на лепшы касцюміраваны калектыў трывала ўвайшоў у праграму свята. Перад яго ўдзельнікамі пастаўлена даволі складаная задача – стварыць калону ў індывідуальным стылі, аформленую адпаведнымі абранай тэме элементамі і дэкарацыямі. Адным словам, прастор для фантазіі і крэатыву вялікі. У гэтым змогуць пераканацца зэльвенцы і госці свята.
О-го-го колькі людзей па традыцыі збярэцца на зэльвенскай зямлі 23-24 жніўня! Яшчэ б! Магія старажытнага свята, права на правядзенне якога яшчэ ў 1501 годзе атрымала ўдава былога ўладальніка мястэчка Зэльва Ганна Улініч, заварожыць кожнага. Дарэчы, па адной з версій, назву кірмашу далі менавіта ў яе гонар.
Падворкі сельскагаспадарчых арганізацый і сельсаветаў таксама прымуць удзел у конкурсе. У рамках кожнай пляцоўкі хлебасольныя гаспадары, як звычайна, рыхтуюцца здзіўляць навізной і арыгінальнасцю ў прыгатаванні страў па рэцэптах вясковых гаспадынь, у выкананні традыцыйных побытавых танцаў па народных матывах.
Рамеснікі ў цэнтральным скверы разгорнуць выставу-продаж унікальных вырабаў. Прыцягнуць позірк сувеніры і падарункі ручной работы з бісеру, скуры, палімернай гліны, дрэва і іншых матэрыялаў. На гандлёвых радах сапраўды купіце ўсё, што душа пажадае.
СпрытныЯ– спартыўна-забаўляльная праграма першага дня ўрачыстасці прыцягне ўвагу аматараў здаровага ладу жыцця, што збяруцца на беразе зэльвенскай жамчужыны. У гэты час, як і ў завяршальны вечар, не забудзьце занатаваць усю гэту прыгажосць на відэа і заліць у гісторыю інстаграм або ТікТок, каб як мага больш карыстальнікаў сацыяльных сетак даведалася аб кірмашы ў нашай невялічкай Зэльве!
Тэматычныя пляцоўкі сёлета па традыцыі разгорнуцца ў цэнтральнай частцы гарадскога пасёлка. Праз дзейнасць рамеснай, гандлёвай, гасціннай, гульнёва-забаўляльнай, коннай і цэнтральнай пляцовак кірмаш захавае свой папулярны фармат. Дадзеная інфармацыя ў першую чаргу будзе карысная для пастаянных удзельнікаў свята.
Упершыню пройдзе конкурс фігур з пяску. Аднаго яго і вады недастаткова, каб горы пяску ў “Пясочным замку” ператварыліся ў сапраўдныя шэдэўры. Толькі карпатлівая праца і поўнае пагружэнне дапаможа ажыццявіць напаўзабытую многімі мару дзяцінства. А яшчэ і яркае зэльвенскае сонца.
Фестываль. Традыцыйны фармат, у якім ўжо шмат гадоў праводзіцца свята.
Хлебаробы стануць галоўнымі героямі «Дажынак-2024», што пройдуць у рамках фестывалю. Ушанаванне працаўнікоў вёскі, якім мы абавязаны хлебам на нашых сталах, з вялікім размахам адбудзецца на галоўнай сцэне кірмашу. У гонар лепшых хлебаробаў – урачыстая цырымонія ўзнагароджвання, а заслужаны калектыў Рэспублікі Беларусь “Белыя Росы” адрасуе аграрыям святочны канцэрт.
Цэнтральная плошча – геалакацыя асноўных фестывальных актыўнасцей. Менавіта тут пройдзе падвядзенне вынікаў разнастайных конкурсаў Ганненскага кірмашу. А выступленне ансамбля казачай песні і танца "Маме нравится!" ўразіць спалучэннем віртуознасці выканаўцаў народнага вакалу і харэаграфіі з рэпертуарам старажытных кампазіцый у сучаснай аранжыроўцы.
Шоу. Кульмінацыяй кірмашу стане светавое шоу падчас закрыцця свята. Упэўнены, відовішчныя піратэхнічныя эфекты, феерверк нікога не пакінуць раўнадушным.
Эх, пракачу! Як і ў мінулыя гады, у Зэльве арганізуюць катанне на конях – па вуліцах будуць калясіць павозкі і брычкі. Гэта інфармацыя асабліва зацікавіць аматараў падобных захапляльных падарожжаў.
Юшку прыгатаваць – не праблема. Смачная і карысная страва з рыбы парадуе вас і вашых родных, паважаныя ўдзельнікі свята. Больш таго, на наступны год нехта сам пажадае прыняць удзел у гэтым спаборніцтве.
Яркія эмоцыі і цудоўны настрой ад жнівеньскіх гулянняў на ўвесь год забяспечаны. Праверана, і не аднойчы. Шчыра запрашаем!
Служба інфармацыі рэдакцыі газеты "Праца"
Интересные и актуальные новости Зельвенского района в нашем Telegram-канале. Подписывайтесь по ссылке!
