Зэльвенскія каталікі падрыхтоўваюцца да святкавання Вялікадня

Пасхальны Трыдуум, які перажываюць хрысціяне каталіцкага веравызнання, падыходзіць да завяршэння. І сённяшні суботні дзень, у першую чаргу, час жалобы па ўкрыжаваным Езусе. З поўдня ў касцёле Святой Тройцы ў Зэльве адчынены дзверы: вернікі маюць магчымасць да двадцаці гадзін вечара маліцца каля сімвалічнай грабніцы Езуса.

Вялікая субота традыцыйна гэта дзень, калі веруючыя людзі чакаюць самай светлай падзеі – Змёртвыхпаўстання Хрыстуса. У 20:00 зэльвенцы прыйдуць на Пасхальную вігілію і супольна, радасна і ўзнёсла, абвясцяць вестку аб перамозе Пана Бога над смерцю.

Таксама на працягу дня рыхтуюцца да свята. На святочны стол гатуюць велікодныя стравы, каб разам з сем’ямі адзначыць Вялікі дзень. Па добрай традыцыі ў касцёле ясвячаюцца чырвоныя яйкі, хлеб, соль, вада, мясныя прысмакі і апетытныя пірагі.

На пачатку пасвянчэння ксёндз Яцэк Маркель чытае спецыяльную малітву, а затым, ідучы па святыні, акрапляе святой вадой кошычкі.

– Для нас Вялікі Дзень – гэта духоўнае свята, якое аб’ядноўвае членаў сям’і верай у Бога, – кажуць бацькі Баброўскія, якія да касцёла прыйшлі з маленькімі дачушкамі. – Ужо праз пару гадзін прывітаем братоў і сясцёр цудоўнымі словамі: “Хрыстос уваскрос” – “Сапраўды уваскрос!”, за святочным сталом будзем дзяліцца велікоднай радасцю. Як сімвал новага жыцця пафарбаваныя яйкі займуць цэнтральнае месца. Жадаем усім людзям дабрабыту, здороўя, няхай Змёртвыхпаўсталы Хрыстус абудзіць нашы сэрцы.

– Наша сям’я жыве з верай у Пана, каталіцкія традыцыі перадаем дзецям і ўнукам, таму ўсе разам прыходзім, каб пасвенціць ежу, каб вечарам сустрэць Светлую падзею, – дзеліцца сям’я Струг. –Святкуем Вялікдзень з надзей на мір, згоду паміж людзьмі, няхай Уваскрасення Хрыстуса дапаможа нам стаць міласэрднымі, уважлівымі адзін да аднаго і аб’яднае любоўю да Бога.

Людміла ПОПКА

Интересные и актуальные новости Зельвенского района в нашем Telegram-канале. Подписывайтесь по ссылке!