Рэтра-дайджэст. Яркія эпізоды Ганненскага кірмашу 2016 года

Акцэнт – на супрацоўніцтва рэгіёнаў

У святкаванні кірмашу прынялі ўдзел госці з Латвіі.

Падчас афіцыйнай сустрэчы з кіраўніцтвам раёна старшыні Добельскага і Яўнелгаўскага муніцыпалітэтаў Андрэйс Спрыдзанс і Гунтыс Лібекс пацвердзілі гатоўнасць развіваць адносіны з Зэльвенскім раёнам. Аб гэтым сведчыць падпісанае бакамі Пагадненне.

Дакумент адкрыў магчымасці для ўдзелу ў распрацоўцы і рэалізацыі праектаў па праграме трансгранічнага супрацоўніцтва «Літва – Латвія – Беларусь» на 2014 – 2020 гг. У прыватнасці, пагадненне нацэлена на развіццё супрацоўніцтва ў культурнай, турыстычнай, спартыўнай, адукацыйнай сферах, а таксама ў сферы сацыяльнага абслугоўвання і іншых галінах, якія ўяўляюць узаемную цікавасць.

Бакі разлічваюць, што паміж Зэльвеншчынай, Яўнелгаўскім і Добельскім краямі ўсталююцца цёплыя і сяброўскія адносіны, наладзіцца абмен вопытам, павялічыцца ўзаемны ўдзел у мерапрыемствах розных напрамкаў.

На музейных вітрынах – эпоха ХVIII стагоддзя

У Зэльве адкрыўся музейны пакой, прысвечаны Ганненскаму кірмашу.

На цырымоніі прысутнічала кіраўніцтва раёна, зэльвенцы і госці. З задавальненнем прынялі запрашэнне на мерапрыемства ўдзельнікі навукова-практычнай канферэнцыі, якая па традыцыі праходзіць у рамках кірмашу. Пасля перарэзвання сімвалічнай чырвонай стужкі, прывітальных слоў адбылася экскурсія.

Стварэнню музейнага пакоя папярэднічала карпатлівая праца па назапашванні матэрыялу. Збі- раць экспанаты, дакументы, фотаматэрыялы і іншыя памятныя рарытэты першымі пачалі супрацоўнікі раённага цэнтра культуры і народнай творчасці. Частка экспазіцыі распавядае пра мінулае Ганненскага кірмашу. Тагачаснае ўбранне для шляхетных дваран, гербы роду Сапегаў, прадметы ўжытку – усё нагадвае пра XVIII стагоддзе, адкуль і бярэ свой пачатак кірмаш. Адзін з раздзелаў прысвечаны коням. На музейных вітрынах – калекцыя сувенірных фігур, вырабленых з гліны, саломкі і г.д. Асобнае месца адведзена самаробным лялькам і батлейцы. Не менш цікавыя экспанаты – тыя, што прадстаўляюць сучасны Ганненскі кірмаш. Гэта і фотаздымкі, і афішы артыстаў, якія выступалі ў розныя гады на кірмашы, разнастайная сувенірная прадукцыя.

Арганізатары заклікаюць усіх, у каго ёсць якія-небудзь памятныя рэчы, звязаныя з гісторыяй кірмашу, папоўніць фонд музейнага пакоя.

Плылі на чым папала

Падчас кірмашу ў Зэльве ўпершыню прайшоў конкурс-заплыў «На чым папала».

Арганізатары спаборніцтваў падхапілі ідэю фестывалю «Аўгустоўскі канал у культуры трох народаў» і наладзілі цудоўнае шоу. Работнікі Зэльвенскага лясніцтва збудавалі пірацкае судна з пустых жалезных бочак. Яркія касцюмы, адпаведная атрыбутыка, музычнае афармленне – усё было прадумана да дробязяў. Пірацкую тэматыку абралі і каманды СВК «Сынкавічы» і прадпрыемства меліярацыйных сістэм. Плаўсродак РАНС паўстаў перад гледачамі ў выглядзе печы, на якой плыў на кірмаш Ямеля. І ўсё было па-сапраўднаму: з трубы ішоў дымок, а ў катле варыўся абед… Зэльвенскія медыкі адправілі ў плаванне «хуткую дапамогу» – самы мініяцюрны плаўсродак конкурсу, выраблены з пластыкавых бутэлек і пенапласту. Як і належыць, у карэце з надпісам «103» размясціўся медработнік. Прадстаўнікі аддзела ідэалагічнай работы, культуры і па справах моладзі прадэманстравалі, што іх Жар-птушка здольная не толькі трымацца на плаву, але і танцаваць на хвалях. Судна РУП ЖКГ прыплыла на караблі з другаснай сыравіны. Бурнымі апладысментамі гледачы сустракалі спектакль, разыграны Нептунам і Русалкай – членамі каманды ДРБУ-118. Прадстаўнікі аддзела адукацыі выпусцілі на хвалі плыт ў выглядзе коннай падводы з сімволікай кірмашу.

Самымі арыгінальнымі члены журы прызналі плаўсродкі лясніцтва, РАНС і РУП ЖКГ (першае, другое і трэцяе месцы адпаведна). Прызамі рэдакцыі газеты «Праца» адзначаны судны ПМС і ЦРБ

На кірмашовай пляцоўцы – паэты

У дзень кірмашу на пляцоўцы летняй эстрады аматары паэзіі сустракалі паэтаў – зяльвян і гродзенцаў.

Паэтычную гасцёўню падрыхтавалі работнікі раённай бібліятэкі, як і дзве цікавыя выставы – “Зэльва паэтычная” і “На нёманскай хвалі”. Першая была прадстаўлена ў асноўным прадукцыяй самой бібліятэкі, а другая – персанальнымі і калектыўнымі зборнікамі членаў абласнога аддзялення Саюза пісьменнікаў Беларусі.

Вядучыя з гонарам за землякоў паведамілі: “Нашы паэты займаюць пачэсныя месцы ў Саюзе пісьменнікаў Беларусі, за сваю творчасць атрымліваюць дастойныя ўзнагароды, удзельнічаюць у шматлікіх конкурсах і становяцца пераможцамі, выдаюць уласныя кнігі, ладзяць цікавыя сустрэчы».

Адзін за адным на сцэне выступалі паэты: Ганаровы грамадзянін Зэльвенскага раёна, уладальнік медаля Францыска Скарыны Уладзімір Мазго, член Саюза пісьменнікаў Беларусі Валянцін Семяняка, пераможца двух конкурсаў, прысвечаных Гродна, Ірына Данік і гродзенцы Дзмітрый Радзівончык, Тамара Мазур, Пётр Сямінскі.

Сустрэча атрымалася надзвычай цёплай, бо сустракалі гледачы выступленне кожнага паэта гарачымі апладысментамі.

Майстравалі лялькі

Упершыню прайшоў конкурс на лепшую кірмашовую ляльку.

Да стварэння кірмашовых лялек удзельнікі конкурсу падышлі вельмі творча. Умеліцы падрыхтавалі «канкурсантак» у розных стылях, з розных матэрыялаў. Беларусачкі і Цыганкі, Дамавіхі і Вяснянкі – усе яны каларытныя і ўнікальныя, бо створаны ў адзіным экзэмпляры. Вышыня лялек – ад паўметра і вышэй. Дарэчы, сярод «намінантаў» былі і мужчынскія лялькі. Чаго толькі каштаваў казачнік Дзед-Барадзед!

Будавалі вежы з пяску

Пафантазіраваць з пяском, камянямі, ракавінкамі і г.д. можна было падчас конкурсу пясочных фігур.

На вачах зэльвенцаў з’яўляліся скульптуры марской тэматыкі і сімволіка кірмашу.

Цікавы сюжэт прыдумалі настаўнікі і вучні дзіцячай школы мастацтваў, за што і атрымалі першае месца. Навучэнцам СШ №2 узнагародай за старанні стаў Дыплом II ступені. Пясочныя фігуры РК БРСМ і прадстаўнікоў СШ №3 ўдастоены Дыплома III ступені.

Жоўтыя, зялёныя, сінія…

Усе колеры вясёлкі можна было ўбачыць на зэльвенцах у час
фестывалю «Color Fest».

На цэнтральным пляжы пасёлка сабралася шмат людзей рознага ўзросту, якія з цікаўнасцю чакалі пачатку шоу.

Калі Color Fest стартаваў, праз пару хвілін над пляцоўкай падняўся рознакаляровы слуп пылу. «Размаляваныя» дзеці былі ў захапленні. Масавы «выкід» фарбы адбываўся кожную гадзіну. Маладыя людзі без стомы танцавалі пад сучасную музыку. Не даваў публіцы сумаваць шоу-балет «Гараж». А крыху пазней госці прыемна здзівілі прысутных майстар-класам па сучасным танцы.

Арганізатары Color Fest паклапаціліся і аб правядзенні на свяце конкурсаў. Частка пераможцаў была выбрана па выніках розыгрышу ў сацыяльных сетках. Астатнія шчасліўчыкі вызначаліся выпадкова: ды-джэі не шкадавалі пакуначкаў з фарбай і кідалі іх у натоўп самым актыўным удзельнікам.

Color Fest панаваў на Зэльвеншчыне да самай цемнаты.