Праз аграгарадок Елка зноў курсіруе рэйсавы аўтобус

У яго слова не разыходзіцца са справай. Так гавораць жыхары Сынкавіцкага сельсавета пра дэпутата па Ярнеўскай выбарчай акрузе Пятра Талая. На бягучым тыдні нават патэлефанавалі ў рэдакцыю, каб праз газету выказаць яму падзяку за неабыякавасць да праблем вяскоўцаў. І, каб не быць галасноўнымі, прывялі такі прыклад.

Яшчэ у мінулым годзе праз аграгарадок перастаў курсіраваць аўтобус Слонім – Елка. Звыклыя да транспартных зносін з суседнім райцэнтрам вяскоўцы адразу адчулі нязручнасць. Са сваёй праблемай людзі звярнуліся да дэпутата.

Некалькі месяцаў Пётр Талай вёў перапіску з аператарам пасажырскіх перавозак. Спачатку прыходзілі фармальныя адпіскі, маўляў, немэтазгодна, няма магчымасці аднавіць маршрут. Але настойлівасць дэпутата ўзяла сваё – у сакавіку ў Елку зноў пусцілі аўтобус.

Фотаздымак носіць ілюстрацыйны характар.

Пётр Аляксандравіч лічыць, што сельскі дэпутат не можа быць раўнадушным да праблем сваіх выбаршчыкаў. Тым больш, калі займае, як ён, такую адказную пасаду – старшыні сельвыканкама.

Са старшынёй салідарны і ўвесь дэпутацкі корпус.

– А як жа іначай, – адзначае Пётр Талай. – Месца дэпутата там, дзе яго выбаршчыкі. Што датычыцца нашых дэпутатаў, то ў іх не замылілася вока адносна праблем вяскоўцаў і магчымасці іх вырашэння. Больш таго, у кожнага сфарміраваўся свой стыль грамадскай работы. Такіх, хто займае пазіцыю “мая хата з краю”, у нас няма.

Тэрэза КАВАЛЕВІЧ

Вам может быть интересно

Comments are closed, but trackbacks and pingbacks are open.