Масавым народным гуляннем завяршыўся масленічны тыдзень на Зэльвеншчыне
У суботу, напярэдадні прабачальнай нядзелі, жыхары Зэльвы развітваліся з
Масленіцай. Згодна старажытным традыцыям, перадвеснавое свята завяршае зіму і
ўслаўляе прыход вясны, сонца і цяпла. Раней лічылася, каб паскорыць вясну,
забяспечыць дастатак і багаты ўраджай, неабходна ўвесь масленічны тыдзень
правесці весела і сытна. А асабліва добра пагуляць у апошні дзень перад Вялікім
постам.
Па-сапраўднаму шумнае і вясёлае тэатралізаванае прадстаўленне разгарнулася на цэнтральнай плошчы райцэнтра. Тыя, хто прыйшоў на свята, радаснымі крыкамі і апладысментамі сустракалі прыгожае шэсце спевакоў і музыкантаў на чале з
Масленіцай і яе сяброўкамі. Прывітаўшы гасцей, добразычлівая гаспадыня свята запрасіла ўсіх весяліцца і жартаваць, прымаць удзел у конкурсах і атракцыёнах, а таксама частавацца масленічнымі стравамі. Прыемны водар разнёсся ў паветры, калі памочніцы Масленіцы вынеслі духмяныя аладкі з варэннем, тварагом і іншымі напаўняльнікамі. Чакалі зэльвенцаў і
прысмакі, якія можна было набыць у палатках выязднога гандлю Зэльвенскага
філіяла аблспажыўтаварыства.
Шырокім попытам у дарослых карысталася печыва і цукеркі, мясныя і рыбныя паўфабрыкаты, у дзяцей – чыпсы і папкорн. Не скупіліся людзі на падарункі і сувеніры. Цудоўныя вырабы з гліны, саломы, дрэва прапаноўнавалі рамеснікі аддзела рамёстваў і традыцыйнай культуры. Дзятва весялілася з рознакаляровамі паветранымі шарамі, падлеткі – на гульнёвых пляцоўках.
Пакуль удзельнікі свята частаваліся, на сцэне разгарнулася дзея ўсяго масленічнага тыдня.
Нагадаем, раней кожны яго дзень меў сваю назву – сустрэча, зайгрышы, цешчына вячэра, дзень святога Уласа, нявеставы пачастункі, прабачальная размова – і патрабаваў адпаведных дзеяннеў. Да прыкладу, панядзелак прысвячаўся сустрэчы Масленіцы, у аўторак хлопцы ішлі ў сваты, каб вясной згуляць вяселле, у сераду цешча павінна была запрасіць зяця на бліны, чацвер адрозніваўся шматлікімі забавамі, у ліку якіх ушанаванне маладых, якія нядаўна пажаніліся, у пятніцу зяць частаваў цешчу, сустрэчай нявесткі з роднымі мужа вылучалася субота.
Нікога не пакінулі раўнадушным выступленні самадзейных артыстаў устаноў культуры раёна. Станоўчыя эмоцыі падарылі мініацюры каралінцаў і кашалёўцаў. З задавальненнем зэльвенскія мужчыны падыгралі дзярэчынскім персанажам – згадзіліся, каб пагадала цыганка, паскакалі разам з казой. Цікавай была сумесная пастаноўка бародзіцкіх і крывіцкіх культработнікаў. Да смаку прыйшліся бліны князеўскіх, дабраселецкіх і міжэрыцкіх гаспадынь. Па-веснавому цёплым быў абрад гукання вясны, падрыхтаваны гуртамі культработнікаў з Галынкі, Елкі і Чырвонага Сяла.
Кульмінацыяй масленічнага тыдня была нядзеля. Людзі прасілі адзін у аднаго прабачэння за дастаўленыя непрыемнасці і крыўды. Гэты дзень цікава і змястоўна паказалі работнікі раённага цэнтра культуры і народнай творчасці.
Наступіў момант развітання з зімой, якая саступала месца вясне. Зэльвенцы ў вясёлым карагодзе пайшлі да вогнішча і там спалілі пудзіла зімы. Але гулянне на гэтым не завяршылася. Арганізатары запрасілі падняцца на сцэну самых актыўных і смелых удзельнікаў гульнёвых забаў. Сярод іх вызначыліся пераможцы, якія атрымалі прызы. Доўгі час яшчэ гучала прыгожая музыка над Зэльвай: вясна павінна пачуць, што яе чакаюць.
Людміла ПОПКА.