«Хацелася сваіми рукамі ствараць нешта цікавае і неардынарнае». Гісторыя таленту Вольгi Рысюк з вёскі Конна
Вольга Рысюк наведвае аддзяленне дзённага знаходжання для інвалідаў амаль з дня яго адкрыцця. Як кажа сама Вольга, трапіла сюды дзякуючы настойлівасці Таццяны Міхайлаўны Мананнікавай, першай загадчыцы аддзялення.
Як чалавек самадастатковы, дзяўчына думала, што наведванне гэтай установы не вельмі ёй патрэбнае.
– Памылялася, – усміхаецца Вольга, згадваючы свае ваганні. – У аддзяленні столькі таленавітых людзей, яны так многа мне дапамаглі і дапамагаюць, што я вельмі ўдзячна Таццяне Міхайлаўне, якая перамагла мой недавер.
Вольга – ураджэнка і жыхарка вёскі Конна. Там закончыла пачатковую школу, а пасля закрыцця Конненскай базавай працягвала навучанне ў Бародзіцкай БШ, Зэльвенскай і Ваўкавыскай санаторных школах. Атрымала сярэднюю адукацыю і паступіла ў Мінскі дзяржаўны каледж швейнай вытворчасці. Як швяя-вышывальшчыца, тры гады працавала на прыватным прадпрыемстве «Ин-Обнова». Работа хоць і давала матэрыяльны дабрабыт, але маральнага задавальнення не прыносіла. Вользе хацелася ствараць нешта цікавае і неардынарнае, а не карпець з дня на дзень над спецвопраткай. Яна ж з дзяцінства сама шыла адзенне для любімых лялек, вышывала, вязала і была ўпэўнена, што здольная стварыць штосьці не толькі патрэбнае для цела, але і для душы.
Вярнулася дадому, і пачаліся пошукі сваёй нішы ў жыцці і мастацтве. Не толькі шыла – вышывала, пачала ствараць карціны з падручных матэрыялаў. Далей – болей: згадала дзіцячае захапленне лялькамі і паспрабавала «перайсці на вышэйшы ўзровень» у іх стварэнні. Незаўважна для сябе моцна захапілася гэтым. То сястры ляльку падарыць, то цёці, то сяброўкам. І ўжо зразумела, што не можа абысціся без гэтага карпатлівага занятку. А тут і Таццяна Міхайлаўна ўгаварыла стаць наведвальніцай дзённага аддзялення. Спецыялісты вельмі дапамаглі дзяўчыне.
Спачатку Іна Анатольеўна Агей, потым – Лідзія Канстанцінаўна Рудая, за што ім Вольга бязмежна ўдзячная. Яе вырабы высока цэняць як у самім аддзяленні, так і за яго межамі. Вольга ахвотна ўдзельнічае ў розных конкурсных паказах, святочных мерапрыемствах і святах. На адным з Ганненскіх кірмашоў яе лялькі вельмі спадабаліся гасцям свята. Спачатку Вольга стварала для сябе персанажы для штодзённага побыту – «для кухні», як кажа дзяўчына. Потым паспрабавала ўявіць сваю гераіню на канцэртнай сцэне, на маскарадзе, на балі. Атрымалася прынцэса ў прыгожым убранні – сучасная Барбі, якую так любяць дзяўчынкі. Адну такую прыгажуню падарыла дзеткам аднаго з гродзенскіх садкоў, дзе працуе Оліна цёця. Зараз Оля рыхтуе ляльку-паварчука: з белым каўпаком, з чарпаком і з фартухам. Усё, як і належыць.
Але не толькі дэкаратыўна-прыкладная творчасць цікавіць Вольгу. Яна наведвае і іншыя гурткі і клубы аддзялення. Незаменная падчас выступленняў на ўсіх святочных мерапрыемствах: навагодніх ранішніках, Васьмісакавіцкіх, Вялікодных і г.д. Ахвотна чытае са сцэны творы любімых паэтаў, удзельнічае ў інсцэніроўках клуба «Соцветие надежд» і гурткоў «Я пою» , «Вся жизнь – театр» (кіраўнік Святлана Лабецкая), адна з актыўных спартсменак у клубе «Здаравячок» і інш. А з якім захапленнем Вольга танцуе! Дуэт Людміла Скіба – Вольга Рысюк паспяхова выступіў на фестывалі нацыянальных культур у Гродне і быў вылучаны на міжнародны форум – «Славянскі базар» у Віцебску. Трэніраваліся дзяўчаты доўга і старанна, не шкадуючы часу і рук і ног, вядома. Іх «Каўбойскі танец» не пакінуў абыякавымі ні гледачоў, ні журы: шчаслівыя і задаволеныя, вярнуліся адтуль з Дыпломам. І гэта – не адзіны танцавальны нумар у рэпертуары Вольгі. Вось і ў Іўе ездзілі з «Макамі» , вельмі спадабаліся там. Да Года адзінства рыхтуюць «Васількі».
Добрая, засяроджаная, клапатлівая, спагадлівая, – кажа пра дзяўчыну загадчыца аддзялення Інна Віктараўна Таляркова. – Яна валанцёр Чырвонага Крыжа, нястомная ў выдумках і ініцыятывах. Мы не ўяўляем без яе ўдзелу ніводнага мерапрыемства.
На ліку Вольгі шмат добрых спраў. Яна ахвотна дзеліцца сакрэтамі свайго майстэрства з іншымі: правяла майстар-клас не толькі для сваіх сяброў, але і для пажылых людзей.
У актавай зале змясцілі выставу творчых работ Вольгі, дзе прадстаўлены і карціны, і вышыўка, і, вядома, асноўны прадмет яе захаплення – лялькі. Глядзіш на ўсю гэтую рукатворную прыгажосць і думаеш: сапраўды, няма межаў чалавечым магчымасцям, палёту яго фантазіі.
Яніна ШМАТКО
Интересные и актуальные новости Зельвенского района в нашем Telegram-канале. Подписывайтесь по ссылке!
Комментарии отключены