Каталіцкія вернікі заўтра адзначаюць Пальмовую нядзелю

  Паводле легенды, у гэты дзень Іісус Хрыстос уехаў у Іерусалім, жыхары якога кідалі да Яго ног пальмовыя галіны. У нас жа сімвал свята замянілі на вярбу, якая штогод першай распускаецца ранняй вясной. Па шматвекавой традыцыі вернікі прыйдуць у касцёл з упрыгожанымі вербачкамі. Сямігадовая Вераніка Пярскевіч разам са сваёй матуляй свежазрэзаныя вербныя галінкі аздобіла стужкамі і кветкамі. Атрымаўся прыгожы святочны букет. Асвечаны ў храме, ён стане абярэгам у доме на ўвесь год. Пасля Пальмовай нядзелі пачынаецца заключны тыдзень Вялікага посту, які папярэднічае Вялікадню. У храмах будзе ўспамінацца пра апошнюю вячэру Божага Сына, Яго асуджэнне, пакуты, укрыжаванне, пахаванне і ўваскрашэнне. На працягу сямі дзён адбудуцца Богаслужэнні, пры-свечаныя разважанню пра мукі Хрыста. Наталля МАЦЮК