Памяць будзе жыць вечна. У Міжэрыцкай базавай школе імя У. Ляха прайшоў урок мужнасці
Кожны год у Міжэрыцкай базавай школе імя У.Ляха праходзіць дэкада грамадзянска-патрыятычных спраў “Афганістан у лёсах нашых землякоў”. Педагогі ўстановы адукацыі падчас выхаваўчых мерапрыемстваў расказваюць пра гісторыю вайны ў Афганістане, яе салдат, вядзецца работа па папаўненні матэрыялаў на афганскую тэматыку, праходзяць экскурсіі ў школьным музеі.
Сёлета з нагоды 36 гадавіны вываду савецкіх войск з Афганістана ва ўстанове прайшоў урок мужнасці “ Афганістан – памяць і боль”.
Данесці да глыбіні душы кожнага з прысутных горыч ваеннага ліхалецця, невыносныя пакуты і выпрабаванні ў цяжкіх кліматычных умовах і разам з тым мужнасць характараў тых юнакоў, на долю якіх выпала прайсці цяжкімі дарогамі афганскай вайны, дапамог былы вучань, выпускнік 1985 года Антановіч Юрый Сяргеевіч.
Пранікнёна, з пачуццём трагізму гучалі патрыятычныя песні вакалістаў раённага Дома культуры. Не пакінулі абыякавымі ўсіх прысутных і песні пад гітару ў выкананні выпускніка школы, а зараз малодшага сяржанта Ваўкавыскага дэпартаменту аховы Анатолія Марцінчыка.
З пачуццём гонару мы можам сёння сказаць, што салдаты неаб’яўленай вайны не забыты. Памятаюць аб высакародным учынку Уладзіміра Ляха нашы навучэнцы, госці ўстановы.
Урок мужнасці даказаў, што памяць пра тое трагічнае і гераічнае мінулае не згасне, заўсёды будзе жыць у сэрцы новых пакаленняў.
Пасля ўроку ўдзельнікі мерапрыемства ўшанавалі памяць Уладзіміра Ляха, наведаўшы магілу воіна-афганца.
Ніна Валадашчык, настаўніца беларускай мовы і літаратуры
Таццяна Міхальчык, кіраўнік школьнага музея баявой славы Міжэрыцкай базавай школы імя У.Ляха Зэльвенскага раёна
Интересные и актуальные новости Зельвенского района в нашем Telegram-канале. Подписывайтесь по ссылке!
