26 апреля – 30 лет со дня Чернобыльской катастрофы
Дзень, адзначаны знакам бяды, дзень найбуйнейшай радыяцыйнай аварыі ў сусветнай гісторыі … Сёння зельвенцы ўспомнілі тых, хто ў далекім 1986 годзе апынуўся ў эпіцэнтры падзей на Чарнобыльскай АЭС.
У памяць аб гераізме людей у раённым цэнтры культуры і народнай творчасці прайшло тэатралізаванае прадстаўленне, прысвечанае 30-цігоддзю трагедыі. У фае ўстановы была арганізавана выстава кніг “Чарнобыль – боль чалавецтва”.
Чарнобыль – гэта безнадзейны сум у вачах людзей, назаўсёды пакінуўшых мясціны, дзе нарадзіліся, выраслі і жылі. Людзей паспешна эвакуіравалі з роднай зямлі. Калоны з тысячы аўтобусаў вывозілі з Прыпяці мясцовае насельніцтва. Толькі за 1986-1989 гады з забруджаных раёнаў пераехала 1500 сямей. У Зельвенскі раён прыбыло 28 чалавек.
Не засталіся ў баку ад бяды нашы землякі: 49 удзельнікаў ліквідаціі чарнобыльскай аварыі пражываюць сёння ў нашым раёне. Разам з іншымі спецыялістамі яны займаліся адключэннем абсталявання, разборам завалаў, ліквідацыяй ачагоў узгаранняў на апаратуры… Ім давялося працаваць у вельмі складаных умовах і пабачыць увесь жах на свае вочы.
Цяжка ўявіць сабе ўсё гора тых, хто назаўжды развітаўся з радзімай. Праз вершы і песні мясцовыя артысты перадалі пачуцці тых, каго непасрэдна закранула чарнобыльская трагедыя.
Шмат гадоў мінула з той страшнай красавіцкай ночы, аднак страты і наступствы не даюць аб сабе забыць і да гэтага часу.
Дзіяна БЕБЕХ.